सोमवारी विभागीय लोकशाही दिनाचे आयोजन

नाशिक -प्रतिनिधी

दि. ९ नोव्हेंबर

नाशिक विभागीय आयुक्त कार्यालयात सोमवार, दिनांक १० नोव्हेंबर २०२५ रोजी विभागीय लोकशाही दिनाचे आयोजन करण्यात येणार असल्याची माहिती विभागीय महसूल अपर आयुक्त जितेंद्र वाघ यांनी दिली.

नाशिक रोड येथील विभागीय आयुक्त कार्यालय येथे सकाळी ११ वाजता हा कार्यक्रम विभागातील सर्व विभाग प्रमुखांच्या उपस्थितीत आयोजित करण्यात आला आहे. जिल्हास्तरावरील लोकशाही दिनात दाखल झालेल्या प्रकरणांबाबत तक्रारदार समाधानी नसतील, तर त्यांनी या विभागीय लोकशाही दिनात त्यांचे अर्ज सादर करता येणार आहेत.

विभागीय महिला लोकशाही दिन

दरम्यान, याच वेळेस विभागीय महिला लोकशाही दिनाचेही आयोजन करण्यात आले आहे. महिलांच्या तक्रारी व अडचणी यांची शासकीय यंत्रणेद्वारे सोडवणूक करण्यासाठी हा दिवस पाळण्यात येतो.ज्या महिलांनी यापूर्वी तालुका किंवा जिल्हास्तरीय महिला लोकशाही दिनात अर्ज केले असतील व त्यांचे प्रश्न न सुटल्यास  त्यांनी त्यांच्या टोकन नंबरसह अर्ज दिनांक १० नोव्हेंबर रोजी सकाळी ११ वाजता विभागीय महिला लोकशाही दिनात सादर करावेत, असे आवाहन विभागीय उपायुक्त (महिला व बालविकास विभाग) चंद्रशेखर पगारे यांनी केले आहे.