शिक्षण परिषदेतून शिक्षकांना मिळणार सकारात्मक शिस्तीचे धडे.

मुंबई, दि. 2 “शिस्त ही भीतीतून नव्हे तर विश्वासातून निर्माण झाली पाहिजे,” असे सांगत शालेय शिक्षण मंत्री दादाजी भुसे यांनी राज्यातील शिक्षकांसाठी सकारात्मक शिस्त विषयावर विशेष शिक्षण परिषदेचे आयोजन करण्याचे निर्देश दिले आहेत. डिसेंबरच्या पहिल्या आठवड्यात ही परिषद सर्व जिल्हा, तालुका आणि केंद्र स्तरावर घेण्यात येणार आहे.

राज्यातील काही शाळांमध्ये विद्यार्थ्यांना शारीरिक शिक्षेचे प्रकार समोर येत असल्याच्या घटनांवर चिंता व्यक्त करत, विद्यार्थ्यांचे मानसिक आरोग्य, सुरक्षित शैक्षणिक वातावरण आणि शिक्षक-विद्यार्थी नातेसंबंध अधिक मजबूत करण्यासाठी हा महत्वाचा उपक्रम राबविण्यात येत आहे.

शिक्षण विभागाने दिलेल्या निर्देशानुसार प्रत्येक शिक्षण परिषदेत किमान 45 मिनिटांचे सकारात्मक शिस्तीवरील विशेष सत्र घेणे बंधनकारक केले आहे.

या सत्रात पुढील मुद्द्यांवर मार्गदर्शन केले जाणार आहे 

शिक्षण अधिकार अधिनियमातील शारीरिक शिक्षेबाबत तरतुदी व शिक्षकांची जबाबदारी

शारीरिक शिक्षेचे प्रकार, स्वरूप आणि त्यांचे दुष्परिणाम

शिक्षेचा विद्यार्थ्यांच्या मनावर व मेंदूवर होणारा परिणाम

सकारात्मक शिस्तीवर विविध शैक्षणिक विचारवंतांचे विचार

सकारात्मक शिस्त तत्वे व त्यांच्या अंमलबजावणीचे तंत्र

संवाद, सहकार्य, समुपदेशनावर आधारित वर्गव्यवस्थापन

योग्य शिस्तीचे मार्ग, तसेच सकारात्मक शिस्त उपक्रम.

या उपक्रमासाठी राज्य शैक्षणिक संशोधन व प्रशिक्षण परिषद यांनी तयार केलेल्या मुख्याध्यापक मार्गदर्शिका  मधील ‘सकारात्मक शिस्त  एक आव्हान’ या लेखाचा आधार घेण्याचे निर्देश देण्यात आले आहेत.